ეს კი სავარაუდო შემადგენლობა და განწყობა

საქართველოს 21-წლამდელთა ნაკრების თავკაცმა ოთარ გაბელიამ ის 20 ფეხბურთელი დაასახელა, რომლებსაც ევრო-2011-ის შესარჩევი ციკლის უახლოესი მატჩებისთვის დაეყრდნობა. შეხსენებისთვის, ჩვენები 4 სექტემბერს სტუმრად თურქეთს, 7-ში კი თბილისში სომხეთს შეხვდებიან, რითაც ჯგუფური ეტაპის მატჩებიც დასრულდება. ქართველებს ჯერაც აქვთ დარჩენილი 14-გუნდა ფლეი-ოფში გასვლის შანსი და ამ შანსებზე “სპორტულმა ამბებმა”
დაწვრილებით დაწერა. საამისოდ, ჩვენებმა დარჩენილი ორივე შეხვედრა უნდა მოიგონ. არის ერთი ფრით და ერთი მოგებით გასვლის ალბათობაც, თუმცა ძალიან მცირე…

მეკარეები: როინ კვასხვაძე (“ზესტაფონი”), გიორგი ბახტაძე (“დიორი”, უნგრეთი);

მცველები: გულვერდ თომაშვილი, ლევან კაკუბავა (ორივე – “დინამო”), ნიკა კვეკვესკირი (“ბაია”), გიორგი რეხვიაშვილი (“ოლიმპი”), გიორგი გურული (“ტორპედო”), ლაშა თოთაძე (“დიორი”);

ნახევარმცველები: გიორგი ივანიშვილი (“შაფჰაუზენი”, შვეიცარია), ნიკა ძალამიძე (ცსკა, რუსეთი), თორნიკე ოქრიაშვილი (“შახტარი”, უკრაინა), ლუკა გუგუჩია (“ბაია”), მურთაზ დაუშვილი (“ზესტაფონი”), გიორგი განუგრავა, თემურ შარაშენიძე (ორივე - “დიორი”), ირაკლი კლიმიაშვილი (“ვიტ ჯორჯია”);

თავდამსხმელები: ლევან მჭედლიძე (“ემპოლი”, იტალია), რევაზ ვარაბაძე (უკლუბოდ), გიორგი ჭედია (“ოლიმპი”), მათე ვაწაძე (“დინამო”).

ეოგორც ხედავთ, გაბელიას სიაში რამდენიმე ცვლილებაა: გუნდს თურქეთში არ ეყოლება დაცვის ლიდერი გიორგი ხიდეშელი, რომელიც დისკვალიფიცირებულია. ჯანო ანანიძე, გეცოდინებათ, თემურ ქეცბაიამ შეიგულა ეროვნული ნაკრებისთვის. გიორგი ილურიძესა და ბაქარ მირცხულავას კი, გაბელიამ სხვები ამჯობინა – ეს, ის ფეხბურთელები არიან, რომლებიც მწვრთნელს 11 აგვისტოს სომხეთთან მატჩისთვის გამოძახებული ჰყავდა.
მთავარი სიახლე - სიაშია იტალიური “ემპოლის” ფორვარდი ლევან მჭედლიძე, რომელიც კარგა ხანს უგუნდოდ იყო. ცნობისთვის, მჭედლიძეს 21-წლამდელთა ნაკრებში არასოდეს უთამაშია, ის ადრეულ ასაკშივე დააწინაურა ეროვნული გუნდის ყოფილმა თავკაცმა კლაუს ტოპმიოლერმა. ასევე, 21-წლამდელებში პირველადაა მოწვეული უნგრული “დიორის” 18 წლის შემტევი თემურ შარაშენიძე.
რაც შეეხება ქუთაისის “ტორპედოს” მცველ გიორგი გურულსა და ზუგდიდის “ბაიას” ნახევარმცველ ლუკა გუგუჩიას, ისინი გაბელიას გუნდში ადრეც ყოფილან გამოძახებულნი, ეგაა, ოფიციალური მატჩი არ უთამაშიათ. სიაშია მათე ვაწაძეც, რომელსაც ტრავმა აქვს, მაგრამ გაბელია იმედოვნებს, რომ თურქეთის მატჩამდე მოირჩენს.

21-წლამდელები 30 აგვისტოს თბილისში დაიწყებენ ვარჯიშს, 2 სექტემბერს გამთენიისას კი სტამბულში გაფრინდებიან, საიდანაც ქალაქი საქარია (სადაც მატჩი უნდა გაიმართოს) 250 კილომეტრის სიშორეზეა. გაბელიას ცნობით, შარაშენიძე და განუგრავა 2 სექტემბერს თურქეთში შეუერთდებიან ნაკრებს, რადგან 1-ში “დიორს” უნგრეთის ჩემპიონატში პრინციპული მატჩი ელის “ფერენცვაროსთან” – გიორგი და თემური კი, ბოლო პერიოდში “დიორის” ძირითად გუნდში დამკვიდრნენ.

წყარო: http://worldsport.ge/Read.aspx?news=9928〈=1